Михаил Варламов: «Аан дойду чөмпүйүөнэ буоларга дьулуһуом!»
Ахсынньы 6 күнүгэр Дьокуускай куоракка «Өрөгөй» күрэс киэҥ уораҕайыгар үһүс төгүлүн буоксаҕа норуоттар икки ардыларынааҕы «Вызов Севера» турнир үрдүк таһымнаахтык ыытылынна. Бу күрэхтэһиигэ саха боксуордара бары эрэллээх кыайыыны ситистилэр.
Турнир сүрүн киирсиитигэр 57 киилэҕэ диэри ыйааһыҥҥа WBA Азия чөмпүйүөнэ буолар иһин Сунтаар улууһуттан төрүттээх, буоксаҕа Арассыыйа спордун маастара, 32 саастаах Михаил Варламов итиэннэ Таиланд Королевствотын эдэр кэскиллээх күрэсчитэ Физит Паучантуэг рингэҕэ күөн көрүстүлэр. Уон рауннаах кытаанах киирсии түмүгэр Саха сирин боотура Михаил Варламов дойдутугар WBA курун аҕалла, бэйэтин аатын идэлээх буокса историятыгар көмүс буукубаларынан суруйда. «Дьулуур чыпчаала» биэриигэ Михаил тириэнньэринээн Филипп Седыхтыын ыалдьыттаатылар.
— Михаил, Филипп, үтүө күнүнэн! Бастатан туран, ситиһиигитинэн итии-истиҥ эҕэрдэ! Кытаанах киирсии кэннэ туругуҥ хайдаҕый? Хас биирдии киирсииҥ кэннэ чөл турукка хайдах кэлэҕин?
Михаил: «Бастаан олус ыарахан буолуо дии санаабытым. Кэлиҥҥи кэмҥэ диетологы кытта ыкса үлэлиэхпиттэн ыла, туругум биллэ тубуста. Быйыл Чукоткаҕа күрэхтэһиигэ кыттарбар битэмииннэрим таһымын көрдөрүүтэ олус намыһаҕа. Билигин барыта этэҥҥэ. Киирсии кэмигэр туругум олус үчүгэй этэ. Онус раунд кэннэ өссө да сэниэм баар курдуга. Хас биирдии киирсиим кэннэ уопутуран иһэбин».
-Михаил, успуорка бастакы хардыыларыҥ хайдах саҕаламмыттарай?
— Сунтаар улууһун Элгээйитигэр төрөөбүтүм. Оҕо сылдьан «Рокки» киинэни көрөн баран буоксаны тута сэҥээрбитим. Иккис кылааска спортивнай секцияҕа киирэри гыммыппар, наһаа кыраҕын диэн төттөрү ыыппыттара. Биир сыл үҥкүүнэн дьарытаммытым, оттон алтыс кылааска дьэ буоксаны кытта олохпун ыкса ситимнээбитим. Бастакы тириэнньэрбэр Марк Николаевич Павловка махталым муҥура суох. Кини кыра нэһилиэктэн буоксаҕа аҕыс успуорт маастарын иитэн-такайан таһаарбыт тириэнньэр быһыытынан биллэр.
-Филипп, Михаилы кытта хаһааҥҥыттан тэҥҥэ үлэлэһэҕин?
— 2021 сылтан бииргэ дьарыктанабыт. Михаил любительскай буоксаҕа икки сүүстэн тахса киирсиилээх, баай уопуттаах буолан, кинини кытта үлэлииргэ холку. Билигин идэлээх буокса эйгэтин үөрэтэбит, саҥа «суолу» тутабыт.
-Михаил, «Вызов Севера» турнирга хаһыс кыттыыҥ буоларый? Утарсааччыларгын хайдах сыаналыыгын?
— Турнир саҕаланыаҕыттан барытыгар кыттыыным ыллым. Сылтан сыл тэрээһин таһыма үрдээн иһэр, утарсааччыларым күүһүрэн иһэллэр диэн бэлиэтиибин. Бастакы уонна иккис турнирга африканецтары кытта күөн көрсүбүтүм, быйыл Таиланд Физит Паучантуэг диэн эдэр боксуорун кытта кииристим. Күүстээх эрээри, арыый уопута тиийбэтин тута биллим. Сорох түгэннэргэ соһутта, киирсиибит барыта “саахымат” партиятын курдук буолла.
-Михаил, бэлэмнэниигэр сүбэ-ама ким биэрэрий?
— Петр уонна Василий Егоровтар, тириэнньэрдэр, инструктордар, диетолог. Бу барыта халыҥ хамаанда үлэтэ. Идэлээх буоксаҕа хамаандата суох туох даҕаны табыллыбат.
-Филипп, Михаил утарсааччыларын үөрэтэҕит дуо, кыайыы ньыматын хайдах тутаҕыт?
— Бастаан утарсааччы антропометриятын көрөбүт (этин-сиинин олоруутун, тутулун), хайдах ньымалары сүрүннээн туһанарын, истиилин ырытабыт. Аныгы кэмҥэ олорор буоламмыт, куйаар ситимигэр күрэхтэр хатылааһыннара элбэхтэр. Бэлэмнэнии кэмигэр инники утарылаһааччыга майгынныыр спарринг-партнеру булабыт…
-Филипп, тириэнньэр быһыытынан иитиллээччиҥ Михаил буоксатын хайдах сыаналыыгын? Күүстээх уонна итэҕэс өрүттэрин ханныктары бэлиэтиэҥ этэй?
— Михаил олус уһун тыыннаах уонна түргэн, сымса хамнаныылардаах боксуор. Бу көрүҥҥэ уһун тыын – тутаах өрүт.
-Эһиги кэлиҥҥэ кэмҥэ Таилаҥҥа баран эрчиллэҕит. Бу дойдуга буокса төһө сайдыылааҕый?
Михаил: “Таилаҥҥа быйыл үс нэдиэлэ дьарыктанныбыт. Бу дойду климатын, аһын-үөлүн, успуорт саалаларын олус сөбүлээтим. Сылы эргиччи халлаан туруга куйаас буолан, ыйааһыны тута сылдьарга табыгастаах. Сылга 1-2-тэ баран дьарыктанар тоҕоостоох эбит диэн бэлиэтээтим”.
-Инникитин өссө улахан буокса промоушеннарыгар, холобур, АХШ-га киирсэр кыахтааххыт дуо?
Михаил: “Хаһан баҕарар үчүгэйи эрэ ырыҥаланыахха наада. Бу олоххо барыта бэйэбититтэн тутулуктаах. Барыта кыаллар!”
-Филипп, иитиллээччиҥ ханна, хаһан киирсэрин барытын эн кэпсэтэн быһаараҕын. Идэлээх боксуор сылга хаста киирсэрэ оруннааҕый?
— Мин санаабар, идэлээх боксуор сылга үстэ-түөртэ күрэхтэһэрэ ордук. Былааннары барытын эрдэттэн оҥоробун. Этии киирдэ даҕаны бары түмсэн мунньахтыыбыт, оттон түмүк быһаарыныыны ылабыт.
-Инникитин туох былааннааххыт?
Иккиэн: “Салгыы үрдүк таһымнаах күрэхтэргэ кыттар баҕа санаалаахпыт. Барыта этэҥҥэ буоллаҕына, Аан дойду чөмпүйүөнэ буолар иһин күүскэ үлэлиэхпит!”
-Михаил, Филипп баҕа санааҕыт туоллун! Чэгиэн туругу, үрдүктэн үрдүк чыпчааллары дабайа тураргытыгар баҕарабын. Көтөр күүһэ кынатыгар, киһи күүһэ дьулууругар!
Ааптар: Виталий БУСЛАЕВ – Долун Күндүл.
Владислав Коротов хаартыскаҕа түһэриитэ.